رياح المحبة

يا رْياح الْمحبة
هْبِّي هْبِّي
صُوݣِي ليا داك الحمام
لٌِـي قارق فِ دوك لْخيام
على السّر لْمخبي
و ݣُولولو يلا نسّاتو الايام
و ثوب لْهيام
شرݣو لْخصام
الݣلب مزال بيه معبي
يا رياح المحبة
هبي هبي
*********
يا شكوة الݣـراب
كُـبي كبي
كبي لينا
كاس كيف الناس
كاسنا علقم
و دُّوق مساس.
كيسانهم من خمرة معتقة
أصلها عنبي
كي كنت انا جنان
و كانو جنبي،
و كانت كل داليا فيا معلقة:
عناقد من سماها لْـ سّاس
رجموها حتى وراقنا
شحفت و كاتساس
و الخدع فيها
على راسو كايتباس
وانا علْ الصدق مْرَبّي
يا شكوة الݣراب
كبي كبي
،**********
يا العين المغرغرٓة
صبي صبي،
صبي و رسمي
على خدي داك الواد
مرة بالفرح
مرة على داك الجرح هواد
و بدمع العين حݣني الدوايا
خليه ليا مداد
و جيبي ورقة
و عليها كتبي
كتبي….
شحال تّْـكــال
من حقنا ف الورت
لي كلاتنا فيه الوقت
و شحال د الزرع
و شحال دْ الحرت
و شحال د جرا
و مزال ما لحقت
و شحال د الكتبة
و مزال بياض الورقة ما بهت
خاصو بزاف المداد
خاصو بلا عداد
صبي يالعين المغرغرة صبي
و حݣني الدوايا
بالدموع وكتبي
************

ياشفايف المحبة
حْبّي حبي
وحدا على خدي
وحدا لݣلبي
و الى غاب داك الخليل
واسي لخاطر لعليل
و خليني انا السما
و هو القمر فالليل
نغزل فيها
خيوط لْوصال
و نوݣف أزطّا و نْسدّي
و لا طفا نُورُو و بْخَل
و نِّيرا عݣبت عݣدة
ب قفّـال مصدّي
و السّْدا حالو تخبّل
نداويها بـْ شفايف لمحبة
و نݣول :
حبي بالحق
حبي بالصدق
وحدا لکَبْدي
و حدا على خدّي
ياشفايف المحبة
حبي حبي.
…..

مقتطف من قصيدة “رياح المحبة”.
ديوان مرضية الحروف